"Sammenlignende erfaring er en absolutt betingelse for den eksperimentelle og vitenskapelige medisin, ellers vandrer legen på måfå og blir offer for tusen illusjoner."
Slik innleia instituttleiar Jan Eirik Ellingsen opninga av den nye forskingsklinikken ved Institutt for klinisk odontologi. Sitatet er henta frå 1800tals-biologen Claude Bernard, og det gjeld framleis i dag, fortsette Ellingsen:
- Kliniske studiar er viktige både for pasientane og for tannhelsepersonellet, og fører ofte til nye prosedyrar for behandling. I klinisk forsking kan me utvikle og etterprøve prosedyrar, slik at me har dokumentert effekten av den behandlinga som seinare vert tilbydd til pasientane.
Onsdag 14. mars vart klinikken offisielt opna med kaker og omvising.
Allereie brukt til klinisk forsking på munntørrheit
Eit forskingsprosjekt i regi av Munntørrhetklinikken har allereie teke i bruk den nye forskingsklinikken. Dei har nettopp avslutta ei undersøking i samarbeid med Oslo universitetssjukehus, der dei undersøkte slimhinner, tenner, spyttsekresjon og smak og luktfunksjon hos 30 pasientar som er ramma av hovud- og halskreft. Ein del av behandlinga av denne krefttypen er stråling, og strålinga treff òg spyttkjertlane. Dette kan øydelegge kjertlane, og føre til munntørrheit.
Strengare krav til forskinga
Det er eit mål for fakultetet å gjere meir klinisk forsking, seier Ellingsen, og alt ligg til rette:
- Me har kompetanse både på forsking og klinisk arbeid. Våre tilsette er utdanna og har erfaring med å planlegge og gjennomføre kliniske studiar. Dessutan har me dyktige klinikarar som kan gjennomføre den praktiske behandlinga i ein klinisk studie. Me har vårt eige kliniske forskingslaboratorium, der me kan gjennomføre ei rekkje analysar av prøvar frå dei kliniske studiane, og me har landets største odontologiske klinikk med 50 000 pasientbesøk i året. Alt dette gjer at me har eit stort potensiale for klinisk forsking, og dette potensialet kan me no, med den nye klinikken, utnytte enno meir.
Samtidig vert krava til denne type forsking strengare. Mange av dei beste vitskaplege tidsskrifta vurderer ikkje artiklar som ikkje er utførte i tråd med nye standardar for klinisk forsking, og med mindre forskinga er registrert i internasjonale forskingsregister. Desse registra stiller òg krav til korleis forskinga skal vere utført.
- Forskarane våre har gjennomført Good Clinical Practice-kurs, der dei vert oppdaterte på dei nyaste krava. Og med den nye klinikken har me fått på plass fasilitetar som er i tråd med slike retningslinjer for klinisk forsking, seier instituttleiar Ellingsen.
Mykje for lite
Den nye klinikken er finansiert av midlar frå Eigedomsavdelinga ved UiO.
- Det opphavlege målet var at forskingsklinikken skulle ha ein eigen tilsett med oppdatert kompetanse på retningslinjer for klinisk forsking. Men økonomien på fakultetet er pressa.
Nettopp derfor er instituttleiaren ekstra nøgd med å ha fått på plass den nye klinikken med små midlar:
- Kontorsjef ved instituttet, Elisabeth Aks, og leiar av dentalverkstaden, Kjell Skaar, har vore viktige for dette prosjektet. Saman har dei gjort at me har fått veldig mykje for lite. Dei har funne gamle møblar, og sett saman nye tannlegestolar av delar frå stolar som har vore øydelagde. Dette er ein unik klinikk på mange måtar, avsluttar Ellingsen.
